विद्यार्थ्यांनो, प्लास्टिकऐवजी स्टीलचे टिफिन व पाण्याच्या बाटल्या वापरा; 'चोपडा क्लायमेट वॉरियर्स' उपक्रमाचा शुभारंभ

विद्यार्थ्यांनो, प्लास्टिकऐवजी स्टीलचे टिफिन व पाण्याच्या बाटल्या वापरा; 'चोपडा क्लायमेट वॉरियर्स' उपक्रमाचा शुभारंभ

​चोपडा, ता. ५ (प्रतिनिधी):
जागतिक पर्यावरण दिनाचे औचित्य साधून चोपडा नगर परिषद आणि 'युथ ऑर्गनायझेशन फॉर ग्रीन इंडिया' (YOGI) यांच्या संयुक्त विद्यमाने शहरात ‘चोपडा क्लायमेट वॉरियर्स’ या महत्त्वपूर्ण उपक्रमाची सुरुवात करण्यात आली आहे. नगर परिषदेत आयोजित एका विशेष बैठकीत हा निर्णय घेण्यात आला असून, शाळांमध्ये प्लास्टिकच्या वस्तूंचा वापर पूर्णपणे बंद करून स्टीलचे टिफिन आणि पाण्याच्या बाटल्या वापरण्याचे आवाहन प्रशासनातर्फे करण्यात आले आहे.

​या बैठकीच्या अध्यक्षस्थानी नगराध्यक्षा नम्रता पाटील होत्या, तर गटशिक्षणाधिकारी अजित पाटील यांची प्रमुख उपस्थिती होती. याप्रसंगी शहरातील शाळांचे मुख्याध्यापक, नगरसेवक तसेच गौरव महाले, संजय बारी आदी मान्यवर उपस्थित होते.
​राष्ट्रीय धोरणांशी सुसंगत पाऊल
​'योगी' संस्थेचे संस्थापक गिरीश पाटील यांनी उपस्थितांसमोर सादरीकरण (प्रेझेंटेशन) करत प्लास्टिकच्या अतिवापराचे गांभीर्य पटवून दिले. हा उपक्रम राष्ट्रीय शैक्षणिक धोरण २०२०, 'मिशन लाइफ' आणि राज्य शासनाच्या हवामान शिक्षण निर्देशांकांशी सुसंगत आहे. यामुळे चोपडा शहराच्या हरित आणि पर्यावरणपूरक वाटचालीला मोठी ताकद मिळणार आहे. नगराध्यक्षा नम्रता पाटील यांनी या मोहिमेसाठी शाळांना नगर परिषदेतर्फे सर्वतोपरी मदत करण्याचे आश्वासन दिले असून, पालक आणि विद्यार्थ्यांनी यात सक्रिय सहभाग घेण्याचे आवाहन केले आहे.

​पहिल्या टप्प्यात 'या' गोष्टी अपेक्षित:
• ​प्लास्टिकबंदी: शाळांमधील प्लास्टिकचे खाऊचे डबे, पाण्याच्या बाटल्या आणि इतर प्लास्टिक आधारित वस्तूंच्या वापरावर पूर्णपणे बंदी घालण्यात येईल.
• ​पर्यायी वस्तूंचा वापर: प्लास्टिकऐवजी स्टीलचे टिफिन, स्टील किंवा तांब्याच्या बाटल्या आणि कागदी कव्हर (पेपर कव्हर्स) चा वापर वाढवण्यासाठी प्रशासन प्रयत्नशील असेल.
​प्लास्टिकचे मानवी शरीरावरील घातक धोके
​बैठकीत संशोधनाचा हवाला देत प्लास्टिकमुळे लहान मुलांच्या आरोग्याला असणाऱ्या धोक्यांवर चिंता व्यक्त करण्यात आली:
• ​मायक्रोप्लास्टिकचा धोका: रोजच्या वापरातील प्लास्टिक डबे व बाटल्यांमुळे 'मायक्रोप्लास्टिक' (प्लास्टिकचे अतिसूक्ष्म कण) विद्यार्थ्यांच्या शरीरात प्रवेश करत आहेत, ज्यामुळे कॅन्सरसारख्या गंभीर आजारांचा धोका वाढतो.
• ​रसायनांचे दुष्परिणाम: प्लास्टिक बनवताना वापरले जाणारे 'बिस्फेनॉल-ए' (BPA) आणि 'फ्थॅलेट्स' ही रसायने शरीरातील अंतःस्रावी प्रणाली विस्कळीत करतात.
• ​जागतिक आरोग्य संघटनेचा (WHO) इशारा: या विषारी रसायनांमुळे लहान मुलांमध्ये लठ्ठपणा, थायरॉईड, मधुमेह आणि प्रजनन विकासात अडथळे निर्माण होऊ शकतात.

​शाळांना सहभागाचे आवाहन
​चोपडा शहरातील सर्व शाळांनी या पर्यावरणपूरक मोहिमेत तातडीने सहभागी व्हावे, असे आवाहन प्रशासनाने केले आहे. अधिक माहितीसाठी आणि नोंदणीसाठी शाळांनी ७५८८१९२३८२ या क्रमांकावर संपर्क साधावा, असे पत्रकात नमूद करण्यात आले आहे.