चोपडा नगरपरिषदेचा 'अन्नपूर्णा महोत्सव' व 'पर्यावरणपूरक पाककला स्पर्धा' उत्साहात संपन्न

चोपडा नगरपरिषदेचा 'अन्नपूर्णा महोत्सव' व 'पर्यावरणपूरक पाककला स्पर्धा' उत्साहात संपन्न

चोपडा: (प्रतिनिधी) संदिप पाटील

स्थानिक पारंपरिक खाद्यसंस्कृतीला उजाळा देण्यासाठी आणि महिला बचत गटांना स्वयंरोजगाराचे व्यासपीठ उपलब्ध करून देण्यासाठी, चोपडा नगरपरिषदेमार्फत आयोजित 'अन्नपूर्णा महोत्सव २०२६' व 'पर्यावरणपूरक पाककला स्पर्धा' मंगळवार, ३ फेब्रुवारी रोजी मोठ्या उत्साहात संपन्न झाली. 'माझी वसुंधरा ६.०' व 'स्वच्छ भारत अभियान २.०' अंतर्गत आयोजित या अभिनव उपक्रमाला चोपडावासीयांनी उत्स्फूर्त प्रतिसाद दिला.

कार्यक्रमाचे उद्घाटन व उपस्थिती

अक्सासो शरद चंद्रिका सुरेश पाटील नाट्यगृहात सायंकाळी ४ ते रात्री १० वाजेपर्यंत हा सोहळा रंगला. कार्यक्रमाच्या अध्यक्षस्थानी माजी आमदार सौ. लताताई चंद्रकांत सोनवणे होत्या. उद्घाटन नगराध्यक्षा सौ. नम्रता पाटील यांच्या हस्ते झाले. यावेळी उपनगराध्यक्ष श्री. पंकज बोरोले, मुख्याधिकारी श्री. रामनिवास झंवर, आरोग्य सभापती श्री. रमेश शिंदे, महिला व बालकल्याण सभापती श्रीमती देवयानी माळी यांच्यासह विविध समित्यांचे सभापती व नगरसेवक उपस्थित होते.

हळदी-कुंकू आणि २,००० महिलांना 'वाण'

कार्यक्रमाची सुरुवात पारंपरिक हळदी-कुंकू समारंभाने झाली. नगरपरिषदेच्या वतीने उपस्थित पहिल्या २,००० महिलांना 'वाण' म्हणून स्टीलच्या वाटीचे वाटप करण्यात आले. महिलांमध्ये उत्साह वाढवण्यासाठी करण्यात आलेल्या या नियोजनाचे सर्वत्र कौतुक झाले.

पर्यावरणपूरक पाककला स्पर्धा

या स्पर्धेत एकूण ६० स्पर्धकांनी सहभाग नोंदवला होता. केवळ पदार्थांची चवच नाही, तर त्यांची पर्यावरणपूरक सजावट (उदा. प्लास्टिकचा वापर टाळून केलेली आरास) हे मुख्य आकर्षण ठरले.

विजेते: प्रमिला छगन बडगुजर, रंजना विजय चौधरी, रुपाली पवन पाटील, किरण आनंदा चौधरी, अनिता संतोष पारधी यांनी यश संपादन केले. ५ स्पर्धकांना उत्तेजनार्थ पारितोषिके देण्यात आली.
परीक्षक: डॉ. धनश्री महाजन, श्रीमती पुनम ठाकरे व भारती पाटील यांनी जबाबदारी पार पाडली.

२७ बचत गटांचे स्टॉल्स: घरगुती चवीची मेजवानी

नगरपरिषदेने कोणताही नोंदणी शुल्क न आकारता महिला बचत गटांना २७ स्टॉल्स उपलब्ध करून दिले होते. यात चोपडा शहरासह धरणगाव व पंचायत समितीच्या गटांचाही समावेश होता.

प्रमुख पदार्थ: कळण्याची भाकर-भरीत, मिसळ-पाव, मुंगभजी, पुरणपोळी, पाणीपुरी, बिर्याणी आणि घरगुती पिठे व मसाले यांची मोठी विक्री झाली.
दत्तकृपा, सुवासिनी, भैरवनाथ, शिवबा यांसारख्या विविध बचत गटांनी आपल्या उत्पादनांचे प्रदर्शन व विक्री केली.

"महिलांना आर्थिकदृष्ट्या सक्षम करण्यासाठी आणि त्यांच्या कौशल्याला व्यासपीठ देण्यासाठी हा महोत्सव आयोजित केला आहे. यापुढे दरवर्षी असा उपक्रम राबवण्यात येईल."

— श्री. रामनिवास झंवर, मुख्याधिकारी, नगरपरिषद चोपडा

मान्यवरांची उपस्थिती

यावेळी सांस्कृतिक सभापती अमोल पाटील, गटनेता रमाकांत ठाकूर, नगरसेवक प्रवीण देशमुख, दीपक पाटील, नेहा जैन, पूजा देशमुख, वंदना बाविस्कर, वैशाली पवार यांच्यासह उपमुख्याधिकारी संजय मिसर, परिविक्षाधीन मुख्याधिकारी सागर शेजुळ व कर्मचारी उपस्थित होते. कार्यक्रमाचे सूत्रसंचालन प्रणव पाटील यांनी केले.

चोपडा नगरपरिषदेचा 'अन्नपूर्णा महोत्सव' व 'पर्यावरणपूरक पाककला स्पर्धा' उत्साहात संपन्न