भुसावळात घरगुती गॅस सिलिंडरचा व्यावसायिक वापर; प्रशासनाकडे तक्रार दाखल

भुसावळ (प्रतिनिधी):

शहरातील जामनेर रोड परिसरातील एका नामांकित संस्थेत घरगुती गॅस सिलिंडरचा वापर व्यावसायिक कारणांसाठी होत असल्याचा खळबळजनक प्रकार उघडकीस आला आहे. या संदर्भात भुसावळचे जागृत नागरिक प्रमोद जगन्नाथ पाटील यांनी जिल्हाधिकारी, जिल्हा पुरवठा अधिकारी आणि तहसीलदार यांच्याकडे लेखी तक्रार केली असून तात्काळ कारवाईची मागणी केली आहे.

नेमके प्रकरण काय?

जामनेर रोड परिसरातील 'श्री समर्थ महिला बहुद्देशीय संस्था' (श्री संत गजानन महाराज देवस्थान संचलित) येथे भाविकांसाठी मोठ्या प्रमाणावर अन्न व प्रसाद तयार केला जातो. तक्रारदारानुसार, या ठिकाणी पोळ्या बनवण्याच्या मोठ्या मशीनसह इतर स्वयंपाकासाठी व्यावसायिक (Commercial) कनेक्शनऐवजी घरगुती (Domestic) गॅस सिलिंडरचा वापर सर्रासपणे केला जात आहे.

तक्रारीतील प्रमुख मुद्दे:

महसूल बुडवल्याचा आरोप: घरगुती गॅसचा वापर व्यावसायिक कामासाठी करणे हा शासनाचा महसूल बुडवणारा प्रकार आहे.
सीसीटीव्ही (CCTV) तपासणीची मागणी: संबंधित ठिकाणचे चित्रीकरण तपासल्यास गॅस सिलिंडरच्या वापराचे सत्य समोर येईल.
कायदेशीर कारवाईची मागणी: सामान्य नागरिकांवर कडक कारवाई करणाऱ्या प्रशासनाने या मोठ्या संस्थेच्या नियमबाह्य कामाचीही दखल घेऊन दंडात्मक कारवाई करावी.

"जर सामान्य माणसाने नियमांचे उल्लंघन केले तर प्रशासन लगेच कारवाई करते. मग अशा संस्थांना वेगळा न्याय का? या प्रकरणाची सखोल चौकशी होऊन दोषींवर कारवाई झालीच पाहिजे," असे मत तक्रारदार प्रमोद पाटील यांनी व्यक्त केले आहे.

प्रशासनाच्या भूमिकेकडे लक्ष

या तक्रारीमुळे पुरवठा विभागात मोठी खळबळ उडाली आहे. आता तहसीलदार आणि जिल्हा पुरवठा अधिकारी या प्रकरणाची चौकशी करून संबंधित संस्थेचे गॅस कनेक्शन जप्त करतात का आणि दोषींवर कायदेशीर बडगा उगारतात का, याकडे शहरवासीयांचे लक्ष लागले आहे.

भुसावळात घरगुती गॅस सिलिंडरचा व्यावसायिक वापर; प्रशासनाकडे तक्रार दाखल