सातपुड्याच्या हिरव्या नंदनवनाचा प्रवास: ‘यावल वनविभागाची यशोगाथा’ पुस्तकाचे उत्साहात प्रकाशन!

​चोपडा (विशेष प्रतिनिधी):संदीप पाटील 

सातपुड्याच्या उत्तुंग आणि विहंगम रांगांमधील निसर्गसौंदर्य तसेच समृद्ध वन्यजीव संपदेचा वारसा शब्दबद्ध करणाऱ्या 'यावल वनविभागाची यशोगाथा' या विशेष पुस्तकाचा दिमाखदार प्रकाशन सोहळा नुकताच मान्यवरांच्या उपस्थितीत उत्साहात पार पडला. निसर्ग संवर्धनासाठी वनविभाग आणि स्थानिक आदिवासी बांधवांनी केलेल्या अथक संघर्षाचा प्रवास या पुस्तकाच्या माध्यमातून लोकांसमोर आणण्यात आला आहे.

​मान्यवरांच्या हस्ते पुस्तक अनावरण

​या कार्यक्रमाचे प्रकाशन सहाय्यक वनसंरक्षक (चोपडा) मा. श्री. एम. बी. पाटील, चोपडा वनक्षेत्रपाल मा. श्री. बी. के. थोरात, वैजापूर वनक्षेत्रपाल मा. श्री. विकेश ठाकरे, आणि अडावद वनक्षेत्रपाल मा. श्री. प्रशांत साबळे यांच्या शुभहस्ते करण्यात आले. याप्रसंगी उपस्थित वनकर्मचारी आणि मान्यवरांनी पुस्तकाचे भरभरून कौतुक केले, तसेच लेखकांचे पुष्पगुच्छ देऊन विशेष स्वागत व सत्कार केला.

​पुस्तकाचे वैशिष्ट्य: सात रेंजची जिवंत यशोगाथा

​हे पुस्तक केवळ एक माहितीपर दस्तऐवज नसून, सातपुड्याच्या सात रेंजचा (चोपडा, वैजापूर, देवझिरी, यावल पूर्व, यावल पश्चिम आणि रावेर सीमा) एक जिवंत दस्तऐवज आहे.

• ​वन्यजीवांचा थरार: चोपडा रेंजमधील शांतता, वैजापूर-देवझिरीच्या दऱ्याखोऱ्यातील जैवविविधता आणि यावलच्या घनदाट सागवान वनातील निलगाय, तळस, बिबट्यांच्या अस्तित्वाचा थरार वाचकांना या पुस्तकातून अनुभवायला मिळणार आहे.
• ​संघर्षाची गाथा: वनअधिकारी, वनपाल, वनरक्षक, रोजंदारी वनसेवक, वनकर्मचारी आणि स्थानिक आदिवासी बांधवांनी जंगल वाचवण्यासाठी दिलेल्या लढ्याचा आणि परिश्रमांचा प्रवास यात प्रभावीपणे मांडण्यात आला आहे.

​रोजंदारी वनसेवकाचे कौतुकास्पद पाऊल

​या पुस्तकाचे लेखन व संकलन रोजंदारी वनसेवक विक्की राजपूत (सुभाष संजय पाटील), वनरक्षक रोहित पावरा व जनार्दन गुट्टे यांनी केले आहे. विशेष म्हणजे, वनांचे महत्त्व जनसामान्यांपर्यंत पोहोचवण्यासाठी विक्की राजपूत हे सातत्याने कविता लेखन आणि नवनवीन उपक्रम राबवत असतात, त्यांच्या या प्रयत्नांचे सर्वत्र कौतुक होत आहे.

​"सातपुड्याच्या या 'हिरव्या नंदनवनाचा' विलोभनीय आणि रंजक प्रवास जवळून अनुभवण्यासाठी, तसेच निसर्ग संवर्धनाची जाणीव जागृत ठेवण्यासाठी हे पुस्तक अत्यंत उपयुक्त ठरेल."

— उपस्थित मान्यवर