चोपडा येथे जागतिक क्षयरोग दिन उत्साहात साजरा; जनजागृतीवर दिला भर

चोपडा येथे जागतिक क्षयरोग दिन उत्साहात साजरा; जनजागृतीवर दिला भर

​चोपडा (प्रतिनिधी):
येथील भगिनी मंडळ संचलित समाजकार्य महाविद्यालयात २४ मार्च या 'जागतिक क्षयरोग दिना'चे औचित्य साधून विशेष जनजागृती कार्यक्रमाचे आयोजन करण्यात आले होते. जिल्हा आरोग्य अधिकारी डॉ. सचिन भायेकर यांच्या आदेशानुसार आणि जिल्हा क्षयरोग अधिकारी डॉ. विशाल पाटील यांच्या अध्यक्षतेखाली हा उपक्रम पार पडला.

​तज्ज्ञांचे मार्गदर्शन
​तालुका आरोग्य अधिकारी डॉ. गिरीश गोसावी यांच्या मार्गदर्शनाखाली आयोजित या कार्यक्रमात तालुका क्षयरोग प्रयोगशाळा पर्यवेक्षक श्री. किशोर सैंदाने यांनी विद्यार्थ्यांना सविस्तर माहिती दिली. त्यांनी सांगितले की, "क्षयरोग हा उपचाराने पूर्णपणे बरा होणारा आजार आहे. दोन आठवड्यांपेक्षा जास्त काळ खोकला, भूक मंदावणे आणि वजन कमी होणे अशी लक्षणे दिसल्यास त्वरित शासकीय रुग्णालयात तपासणी करावी. शासकीय रुग्णालयांमध्ये याची मोफत तपासणी, औषधोपचार आणि मार्गदर्शन उपलब्ध आहे."
​विद्यार्थ्यांचा सहभाग आणि संकल्प
​समाजात टीबीबाबत असलेली भीती घालवून जनजागृती कशी करता येईल, याबाबतही विद्यार्थ्यांना याप्रसंगी प्रोत्साहित करण्यात आले. कार्यक्रमाच्या यशस्वीतेसाठी आरोग्य निरीक्षक विजय देशमुख, तालुका क्षयरोग समन्वयक राहुल सोनवणे यांनी मोलाचे सहकार्य केले.
​याप्रसंगी महाविद्यालयाचे प्राचार्य डॉ. ईश्वर सौंदाणकर, प्रा. डॉ. राहुल निकम, प्रा. डॉ. उत्तम सोनकांबळे यांच्यासह सर्व प्राध्यापक आणि विद्यार्थी मोठ्या संख्येने उपस्थित होते. सर्वांनी मिळून 'क्षयरोग मुक्त भारत' करण्यासाठी योगदान देण्याचा संकल्प यावेळी केला.